Молитвы от порчи детей.

[вэрвиндла]

Молитвы от порчи детей

Читается Великомученику Никите молитва от порчи детей:

О великий страстотерпче Христов и Чудотворце великомучениче Никито! Припадающе к святому и чудотворному образу твоему, подвиги же и чудеса твоя и многое сострадание твое к людем прославляюще, молим тя прилежно: яви нам смиренным и грешным святое и многомощное твое заступление: се бо грех наших ради не имамы свободы чад Божиих, еще потребах наших Господа и Владыку нашего дерзновенно просити: но тебе молитвенника к Нему благоприятнаго предлагаем и о твоем предстательстве взываем: испроси нам у Господа благопотребныя дары душам и телесем нашим: веру правую, спасения надежду несомненную, любовь же ко всем нелицемерную, во искушениях мужество, в злостраданиях терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и благочестное на земли житие, христианскую жития кончину и добрый ответ на Страшнем Судищи Христовем. Еще же, о страстотерпче Христов, у Царя Небеснаго испроси благочестивому народу нашему мир, здравие и спасение, и на враги победу и одоление, всей же богохранимой стране нашея благоустроение, тишину и благоденствие. Христолюбивому воинству буди соратай и помощник на враги и всем людем православным яви твое святое заступление: болящия исцели, скорбящия утеши, бедствующим помоги: Ей, угодниче Божий, и мучениче долготерпеливый! Не забуди святую обитель твою и вся живущыя в ней и подвизающияся инокини же и мирския, но поспеши им в смирении и терпении носити иго Христово, и от всяких бед и искушений милостивне избави. Всех убо нас приведи в тихое пристанище спасения и наследники сподоби быти пресветлаго Царствия Христова святыми твоими молитвами: да славим и поем великия щедроты Отца и Сына и Святаго Духа, в Троице славимаго и покланяемаго Бога и твое святое заступление во веки веков. Аминь.

Вторая молитва от порчи детей:

К тебе, яко скорому и избранному спасения нашего ходатаю, богоизбранному воеводе, оружием креста враги победившему, великомучениче Никито, вседушно прибегаем: не отвратися от нашея нищеты, молению нашему внемли, и от бед нас и обитель сию сохрани. Простри руку твою, скорую помощь подающую. Управи ум наш от пагубоносных разсеяний, и сердца наша оскверненная очисти, освяти и горе имети утверди.

От враг видимых и невидимых нас храни, да над страстьми победители явимся, творяще святыню во страсе Господни, и всякое уныние поправше, радоватися о Господе начнем; итако твоими ходатайствы, во смирении и простоте сердца, сподобимся до последнего издыхания боголепно Отца и Сына и Святаго Духа воспевати и твоя боговенчанныя подвиги и чудеса прославляти во веки веков. Аминь.